Thethi është një fshat malor me bukuri të rrallë që ndodhet në zemër të Alpeve të Shqipërisë, rreth 70 km larg nga Shkodra. I shtrirë në pjesën më veriore të luginës së Shalës, ai është kthyer në një nga destinacionet më të njohura turistike për natyrën e tij të paprekur, panoramat mahnitëse dhe trashëgiminë kulturore që ruan me fanatizëm.
Për të arritur në Theth, udhëtimi kalon përmes Qafës së Tërthores me lartësi 2000 metra dhe më pas zbret në Gropën e Thethit, duke kaluar pranë përroit me të njëjtin emër. Gjatë rrugës, peizazhet mbresëlënëse të Alpeve lënë pa frymë çdo vizitor, ndërsa të apasionuarit pas fotografisë gjejnë shtigje të pafundme për të kapur bukurinë natyrore.
Disa nga atraksionet kryesore janë ujëvara dhe kanioni i Grunasit, burimet e ftohta të Okolit, shpellat, mali i Harapit dhe Birat e Rrathëve. Falë vendndodhjes pranë kufirit dhe interesit në rritje për turizmin malor, Thethi është zhvilluar si një qendër turistike me bujtina dhe ndërtesa alpine tradicionale, që mirëpresin çdo vit vizitorë nga e gjithë Shqipëria dhe Europa. Ky fshat është jo vetëm një destinacion i jashtëzakonshëm natyror, por edhe një vend ku ruhen gjallë traditat, mikpritja dhe mënyra e jetesës alpine.
